ԿարևորՔաղաքական

Գնաճը կանխատեսվածից ավելի կլինի, ասում է ԿԲ նախագահը

Լուսինե Վասիլյան

«Ռադիոլուր»

Խորհրդարանն այսօր սկսել է գարնանային նստաշրջանի վերջին քառօրյայի աշխատանքները: Քառօրյայի   օրակարգը խիստ հագեցած է. քննարկման է սպասում ավելի քան  6 տասնյակ օրինագիծ, վավերացման՝ մոտ  30   միջազգային պայմանագիր:
Օրակարգի գերակշիռ մասը կառավարության օրենսդրական նախաձեռնություններն են: Ի դեպ,  դրանցից երեքը գործադիրի առաջարկով խորհրդարանը կքննարկի հատուկ կարգով, այսինքն՝  երկրորդ ընթերցմամբ քննարկումները  կկազմակերպվեն  առաջին ընթերցումից հետո 24 ժամվա ընթացքում:
Անհետաձգելի համարվող նախագծերից մեկը Դիլիջանի միջազգային դպրոցին հարկային ու մաքսային արտոնությունների տրամադրման հարցն է, որի քննարկումը խորհրդարանը սկսել է օրվա վերջին նիստի ընթացքում, իսկ մինչ այդ քննարկումները ծավալվել են ԿԲ հաշվետվության ու ծրագրի շուրջ:

Իսկ քառօրյան մեկնարկեց ավանդական քվեակություններով և արդեն ավանդական դարձած հարցուպատասխանով, որը յուրաքանչյուր քառօրյայի մեկնարկին ծավալվում է  «Ժառանգություն» խմբակցության պատգամավոր Զարուհի Փոստանջյանի և ԱԺ նախագահի Հովիկ Աբրահամյանի միջև. ընդդիմադիր պատգամավորը հետևողականորեն հետաքրքվում է հայ-թուրքական  արձանագրությունների ճակատագրով, ԱԺ նախագահը  հետևողականորեն ներկայացնում է իր չփոփոխված դիրքորոշումը:

Խորհրդարանն այսօր քվեարկությամբ մերժեց ՀԱԿ խմբակցության պատգամավոր Հրանտ Բագրատյանի հեղինակած երկու օրինագծերը ԱԺ օրակարգ ընդգրկելու հարցը:  Նախաձեռնություններից մեկը, ի դեպ,  վերաբերում էր օֆշորային գոտիներում գրանցված ընկերությունների գործունեությունը կանոնակարգելուն. պատգամավորն առաջարկում էր օրենսդրորեն ամրագրել,  որ այդպիսի ընկերությունները չեն կարող առնչություն ունենալ հայաստանյան հանքարդյունաբերության ոլորտին:

Իսկ օրվա քննարկումները ծավալվեցին նախորդ քառօրյայի ընթացքում ընդհատված հարցի շուրջ. նախորդ քառօրյայի ավարտին  Կենտրոնական բանկի նախագահը ներկայացրել էր  բանկի 2012 թվականի դրամավարկային  քաղաքականության ծրագրի կատարման հաշվետվությունը և 2013 թ. դրամավարկային քաղաքականության ծրագիրը:

Կենտրոնական բանկը  2013 թ. առաջին եռամսյակի համար նախանշել է 3,5 տոկոս գնաճ: Կարկուտի հասցրած վնասն ու գազի գնի բարձրացումը, սակայն, Կենտրոնական բանկին ստիպում են վերանայել նախանշած գնաճը:

«Մենք ստիպված ենք վերանայել մեր գնաճային սպասումները. Մեր հաշվարկներով ունենալու ենք մեր նախատեսածից 2.5 տոկոսով ավելի գնաճ: Դա բավականին լուրջ թիվ է»,- ասում է ԿԲ նախագահ Արթուր Ջավադյանը։
Կենտորնական բանկը փորձելու է վերանայել իր կողմից վարվող քաղաքականությունը: Ըստ Ջավադյանի՝ անցումն  ավելի կոշտ դրամավարկային քաղաքականության այս փուլում արդարացված կլիներ: ԿԲ-ն  կբարձրացնի՞  վերաֆինանսավորման տոկոսադրույքը , թե՞ ոչ՝ Արթուր  Ջավադյանը խորհրդարանական ամբիոնից դեռ պատրաստ չէր հայտարարել: 

Իսկ քննարկումը դրամավարկային ծրագրի շուրջ խորհրդարանում առիթ էր քննարկելու բանկային համակարգի խնդիրներն ընդհանրապես: Ի դեպ , մտահոգություններ այս թեմայով  ունեին ոչ միայն ընդդիմադիր, այլ նաև հանրապետական պատգամավորները: Բանկե՞րն են աշխատում տնտեսության համար, թե՞ տնտեսությունը բանկերի, ԱԺ փոխնախագահ Հերմինե Նաղդալյանի հարցն էր:

«Այնուամենայնիվ՝ մեզ համար հարց է մնում. Էս բարձր իրացվելիությամբ, լավ զարգացած բանկային համակարգը մեզ ի՞նչ է տալիս, եթե տնտեսության իրական սեկտորը դրանից չի շահում կամ կտրված է դրանից»:

ՀՅԴ-ից Արծվիկ  Մինասյանի մտահոգություններն ավելի խորն էին: Ինչքան ուզում եք թվեր հայտարարեք, միևնույնն է, դրանք բովանդակություն չունեն, ամբիոնից հայտարարեց դաշնակցական պատգամավորը:

Օրվա ավարտին ԱԺ-ն սկսեց Դիլիջանի միջազգային դպրոցին հարկային ու մաքսային արտոնություններ տրամադրելու մասին կառավարության ներկայացրած օրինագծի քննարկումը: Գործադիրն առաջարկում է ծրագրի շրջանակներում արտնություններ ապրանքների ներմուծման, գույքի ձեռք բերման եւ ծառայությունների ստացման գործարքների գծով: Հիշեցնեմ, Դիլիջան քաղաքում նախատեսվում է կառուցել եւ շահագործել միջազգային չափանիշներին համապատասխանող  դպրոց:

Ամբողջ ծրագրի արժեքը գնահատվում է շուրջ 550 մլն դոլար չափով, որից 150 մլն-ը  նախատեսվում է ներդնել դպրոցի շենքի կառուցման եւ անհրաժեշտ գույքային միջոցների ձեռքբերման, իսկ շուրջ 400 մլն  դոլարը` գործառնական ծախսերի ու դպրոցի հետագա զարգացման ուղղությամբ:

Կառավարությունը օրինագիծը հիմնավորում է հանգամանքով, որ  հարկային եւ մաքսային արտոնությունների բացակայությունը հնարավորություն չի տալիս, որ նվիրատվություններից գոյացած միջոցներն ամբողջությամբ ծախսվեն ծրագրի իրականացման համար:

Օրինագծի քննարկումը խորհրդարանը կշարունակի վաղը:  Օրակարգում է նաև նվազագույն աշխատավարձը 10 հազար դրամով բարձրացնել առաջարկող  օրենսդրական փաթեթը:

Ցուցադրել ավելի
Back to top button