ԿարևորՏնտեսական

Բագրատ Ասատրյան.Մայիսը ոչ միայն հաղթանակների, այլեւ գների հաղթական աճի ամիս էր

Լիանա Եղիազարյան
«Ռադիոլուր»

Որտեղից են սկսվել եւ ուր են տանում հայաստանում սկիզբ առած սոցիալական խնդիրները, եւ ինչ նոր սպառնալիքներ են առաջադրում հայաստանում սրվող ժողովրդագրական խնդիրները: Այս հարցերի շուրջ այսօր բանավիճել են տնտեսագետ Բագրատ Ասատրյանը եւ ՀՀ Ազգային ժողովի սոցիալական հարցերի մշտական հանձնաժողովի նախագահ Հակոբ Հակոբյանը: Տնտեսագետին զայրացրել ու մտահոգում են կառավարության չիրականացած խոստումները եւ նրա բնորոշմամբ` կասկածելի կետերը, իսկ Հակոբյանը փորձել է կառավարության ծրագրի առավել խոստումնալից կետերն առանձնացնել` որպես խնդիրների լուծում կոչ անելով պարզապես ավելի շատ սիրել մեր երկիրը:

Մայիսն այս տարի մեզ համար ոչ միայն հաղթանակների, այլեւ գների հաղթական աճի ամիս էր, ասում է տնտեսագետ Բագրատ Ասատրյանը: Գազից ու գազով սկսված շղթայական թանկացումներին որպես շարունակություն եկավ կառավարության ծրագիը` նախ խոստումներով, ապա խոստումների վրա սառը ջուր լցնելով: Խոստացվեց աշխատավարձերի ու կենսաթոշակների բարձրացում, սակայն երեկ պարզվեց, որ բարձրանալու է միայն նվազագույն աշխատավարձը: Հիմա էլ խոստանում են, որ աշխատավարձերը կբարձրանան 2014թ-ի հունվարի 1-ից` անգամ մի քանի անգամ: Ասատրյանի գնահատմամբ` Հայաստանում ստեղծված է սոցիալական բարդ իրավիճակ, որն էլ համեմվում է անորոշ հայտարարություններով ու չիրականացող խոստումներով:

ՀՀ Ազգային ժողովի սոցիալական հարցերի մշտական հանձնաժողովի նախագահ Հակոբ Հակոբյանը չի հերքում` այսօր լուրջ խնդիրներ կան, նաեւ` ժողովրդագրական: Սակայն ծնելիության նվազման տխուր վիճակագրությունը Հակոբյանը դիտարկում է զարգացած երկրների ցուցանիշերի համեմատությամբ: Կյանքը ցույց է տվել, ասաց, որ զարգացող երկրներում էլ է ծնելիությունը պակասել։ Եթե կառավարությանը պարտադրենք մեծ փողեր ծախսել, էլի չի ավելանալու ծնելիությունը: Ծնունդների նվազման պատճառը քաղաքացի-պետություն սիրո բացակայության մեջ է: Հակոբ Հակոբյանն այս բանաձեւով է չափում երկրում տեղի ունեցող ժողովրդագրական միտումները: Հանրապետական պատգամավորը չհերքեց Բագրատյանի փոխանցած գնահատումները, թե այս տարվա առաջին երեք ամիսներին նախորդ տարվա համեմատ 10 հազարով ավելի մարդ է հեռացել Հայաստանից, այսինքն` արտագաղթը շուրջ 30%-ով ավելացել է: Նա պատճառը տեսնում է Հայաստանում աշխատանք գտնել չկարողանալու մեջ, լուծումը` ներմուծումը կրճատելու: Հակոբյանը, սակայն, խնդիրներից ավելի, բնականաբար, գերադասեց խոսել կառավարության ծրագրի ամենախոստումնալից կետերի մասին:

Ասատրյանին արդեն կասկածելի են թվում կառավարության ծրագրի որոշ կետերից սպասելիքները: Տնտեսագետը հարցադրում է կատարում` ինչպես պետք է առաջիկա հինգ տարիների ընթացքում ծնելիության գործակիցը հասնի 1.8-ի, երբ ծնունդների թիվն արդեն անկում է ապրում: Նրան զայրացրել է նաեւ ՀՀԿ-ական ակնառու դեմքերից մեիի հայտարարությունը, թե հայերին միշտ էլ բնորոշ է եղել արտագաղթելը: Բագրատյանն այսօր առաջին անգամ կիսվեց նաև իր նոր մտահոգությամբ: Ըստ նրա` անհրաժեշտ են լուծումներ, հակառակ դեպքում Հայաստանն առաջին անգամ կանգնելու է հետևյալ փաստի առաջ` ծնվողների թիվը ավելի քիչ է լինելու, քան մահացողներինը: Բագրատ Ասատրյանի ու լրագրողների նման գնահատումներին, սակայն, հանրապետական պատգամավորը պատասխանեց դրականն ու լավը տեսնել չցանկանալու մեղադրանքով:

Ցուցադրել ավելի
Back to top button