ԿարևորՀասարակություն

Բնապահպան.Առաջիկա ձմռանը հատվելու են Հայաստանի անտառները

Հասմիկ Դիլանյան
«Ռադիոլուր»

Մինչ բարձրաստիճան պաշտոնյաները բանակցում են գազի սակագնի վերջնական գնի շուրջ, սպառողների իրավունքների պաշտպաններն ու բապահպանները ահազանգում են գազի սակագնի բարձրացման հետևանքով սպասվող վտանգների մասին: Բնապահպան Ինգա Զարաֆյանը հայտարարել է, որ առաջիկա ձմռանը հատվելու են Հայաստանի անտառները, կորցնելու ենք անտառային գենոֆոնդն ու կրկնվելու է այն, ինչ տեղի ունեցավ 90-ականների մութ ու ցուրտ տարիներին:

Բնապահպանները կրկին անհանգստացած են, պատճառն այս անգամ գազի սակագնի բարձրացումն է, առանց այն էլ սոցիալապես անապահով վիճակում գտնվող քաղաքացիները ձմռանն իրենց բնակարանները տաքացնելու համար սկսելու են լայնամասշտաբ անտառահատումները: Սա արդեն հայաստանյան անտառների վերջն է լինելու: Էկոլուր տեղեկատվական կենտրոնի տնօրեն Ինգա Զարաֆյանն արդեն կոնկրետ գիտի, թե թիրախում հատկապես որ մարզի որ անտառներն են լինելու:

«Մենք սպասում ենք առաջինը այս ձմեռվա ընթացքում արդեն Գեղարքունիքի մարզի այն անտառները, որոնք բավականին բարձր են, ու նրանք, ի միջայլոց, հատուկ պահպանողական ֆունկցիա ունենք: Գրեթե ամբողոջությամբ կտրվելու են, քանի որ գազի գինը շատ բարձր է, մարդիկ չեն կարող այդ գազի համար վճարել: Վառելափայտ չեն կարող առնել, որովհետև մեկ խորանարդ մետր վառելափայտն այս ձմեռ արժեր 20-23 հազար դրամ: Քչերը կարող են իրենց համար գնել այս վառելափայտը և օգտագործել: Կտրելու են այն անտառը, որը բնապահպանական մեծ ֆունկցիա ունի՝ հատուկ պահպանվող տարածքներ են ու արգելավայրեր»:

Կորցնելու ենք անտառային գենոֆոնդը, կրկնվելու է այն, ինչ տեղի ունեցավ 90-ականների մութ ու ցուրտ ձմեռներին, կանխագուշակումը կրկին Ինգա Զարաֆյանին է: Հոռետեսական կանխատեսումների համար նա պարզաբանում ունի.«Եթե մարդն ընկնում է ծանր սոցիալական բեռի տակ, ինքն արդեն ոչ մի բանի չի նայի, ուզում ես խստացրու՝ ինքն ասում է՝ ես մրսում եմ, երեխաս մրսում է և վերջ, ոչ մի բանի չի նայի: Մենք կարող ենք կրկնել այդ շատ ծանր տարիները»:

Գրեթե նույն կարծիքին է սպառողների իարվունքների պաշտպան Արմեն Պողոսյանը, ում երեկ չէին հրավիրել խորհրդարան՝ մասնակցելու գազի սակագնի բարձարցման քննարկումներին: Որևէ ծառայության սակագին որոշվում է հանրային ծառայությունները կարգավորող հանձնաժողովի նիստում և որևէ պաշտոնյա իրավասու չէ նախապես հայտարարել , որ գազի գինը կարժենա 156 կամ 159 դրամ: Նրա ասածը կարելի է ի գիտություն ընդունել և միայն այսքանը,- ասում է Պողոսյանը: Այն, որ գազի սակագնի բարձրացումը շղթայական ռեկացիայով բերելու է ամեն ինչի թանկացմանը, գիտի նաև սպառողների իրավունքների պաշտպանը:

Եթե Ինգա Զարաֆյանը անտառային գենոֆոնդի կորստի վտանգ է տեսնում, Արմեն Պողոսյանը կարծում է, որ Հայաստանում հոգեվարքի մեջ է էլեկտրոտրասնպորտը, մինչդեռ կարելի էր Մետրոպոլիտենի կայարաններն ավելացնել ու խթանել ընդհանրապես էլեկտրոտրանսպորտի զարգացմանը.«Քաղաքակիրթ աշխարհի միակ հեռանկարը, էլեկտրոտրանսպորտի զարգացումն է, Մադրիդում վերջին հինգ տարիներին կառուցվել է 74 կմ մետրո, փորձենք պատճառները հասկանալ: Նախ իներցիոն մտածողություն՝ ինչպես հեշտ է, այնպես անել, ամենակարևորը՝ սա ձեռնտու է , մի քանի հոգի կարողանում են ամբողջ շրջանառության կեսը գրպանել, և իրենց ձեռնտու չի, որ մետրոն, տրոլեյբուսը զարգանա»:

Իսկ գազի սակագնի բարձրացման բոլոր բացասական հետևանքները, որքան էլ պատկան մարմինները հավաստիացնեն , թե մեղմելու են, միևնույնն է մեզնից յուրաքանչյուրը սեփական մարմնի վրա է զգալու և ոչ շատ ուշ:

Ցուցադրել ավելի
Back to top button