Սաթիկ Իսահակյան
«Ռադիոլուր»-Արմավիրի մարզ
Արմավիրի բժշկական կենտրոնը համալրվել է բժշկական նորագույն սարքավորմամբ, որը թույլ է տալիս կատարել ոսկրային բեկորների փակ համադրումներ: Էլեկտրոն օպտիկական վերարտադրիչ սարքը ձեռք է բերվել բարեգործների ներդրումների շնորհիվ, որին աջակցել է Ռուսաստանում Կորեայի հանրապետության արտակարգ և լիազոր դեսպան Վի Սուն Լակը : Վիրահատական սարքավորումն աշխատում է ռենտգենյան ճառագայթների սկզբունքով, արդյունավետ է և կրճատում է վիրահատության տևողությունը:
Էլեկտրոն օպտիկական վերարտադրիչ սարք, սա բժշկական նորագույն սարքավորում է, որն արդեն մի քանի ամիս տեղ է գտել Արմավիրի հիվանդանոցի վիրահատական սրահում և հեշտացրել է վիրահատության գործընթացը: Սարքը հնարավորություն է տալիս կատարել ոսկրաբեկորային փակ համադրումներ` բաց վիրահատությունների փոխարեն: Սարքավորման միջոցով պատկերն ավելի ճշգրիտ է ստացվում : Արմավիրի բժշկական կենտրոնի վնասվածքաբանական բաժանմունքի բժիշկ վնասվածքաբան Վահան Հարությունյանը նշեց, որ երկու ամսվա ընթացքում արդեն իրականացրել են 15 վիրահատություն, որից 3-ը`ազդրի բարդ վիրահատություն: Ծանր վիրահատությունը նախկինում կատարվել է 4-5 ժամվա ընթաղցքում, իսկ այժմ տևում է ավելի քան մեկ ժամ:
Էլեկտրոն օպտիկական վերարտադրիչ սարքավորումը ռենտգենյան ճառագայթների դեր է կատարում. բժիշկների խոսքերով ` ռենտգենոսկոպիա և ռենտգենոգրաֆիա, իսկ վիրահատության ընթացքում թույլ է տալիս ստանալ մինչև 150 պատկեր:
Նորագույն արդիական բժշկական սարքավորումների անհրաժեշտությունն ավելի է զգացվում Արմավիրի հիվանդանոցում հատկապես հիմնանորգումից հետո, որտեղ պայմանները բարելավվել են և կրճատվել է մարզից դեպի մայրաքաղաքի կլինիկաներ ուղղվող հիվանդների հոսքը: «Արմավիր» բժշյկական կենտրոնի տնօրեն Սարգիս Խաչատրյանի տեղեկացմամբ կլինիկան հագեցած է նոր սարքավորումներով և ավելի արդիական է կազմակերպվում բուժումը:
Վնասվածքաբանական նորագույն սարքավորումը ձեռք է բերվել բարերարների շնորհիվ և նվիրվել է հիվանդանոցին որպես կլինիկայի սեփականություն: Այս գործում իր նպաստն ունի Հայաստանում Կորեայի հանրապետության գլխավոր հյուպատոս Արմեն Աբրահամյանը: Հիվանդանոցում արդիական տեխնոլոգիաները հնարավորություն են ստեղծել ուղիղ կապի միջոցով վիրահատության պահին անմիջական խորհրդատվություն ստանալ Երևանի բժշկական կենտրոնների նեղ մասնագետներից ` հիվանդների բուժման վերաբերյալ, իսկ բուժումն ավելի մատչելի է:
