Նվարդ Դավթյան
«Ռադիլուր»
http://www.armradio.am/hy/wp-content/uploads/2013/05/070513martirosyan.mp3
Մայիսի 5-ին կայացած Երևանի ավագանու ընտրություններին ամբողջական ու օբյեկտիվ գնահատական տալու համար «Բարև Երևան» դաշինքի ցուցակը գլխավորող Արմեն Մարտիրոսյանին ժամանակ է պետք: Բայց որոշ գնահատականներ ու եզրակացություններ նա, այնուամենայնիվ, ներկայացնում է:
«Հակաօրինական հաղթանակ էր` ընտրախախտումների ողջ սպեկտրով»,- ասում է։
Արմեն Մարտիրոսյանն ասում է, որ 2007-ից հետո այսպիսի ընտրություն չէր տեսել: Իշխանությունը, ըստ նրա, այլ ընտրություն չէր կարող կազմակերպել:
Մարտիրոսյանի խոսքով` այն, որ մեր քաղաքացիներն ընդունեցին համատարած բաժանվող ընտրակաշառքը, փաստ է ու նաև հասկանալի, նրա գնահատմամբ, երկրում 70-80 տոկոս աղքատության պայմաններում:
Արդյո՞ք միայն քաղաքացին է մեղավոր, հարցնում է Մարտիրոսյանն ու ինքն էլ պատասխանում` իհարկե՝ ոչ:
«Այստեղ ավելի շատ տեսնում եմ ընդդիմության մեղքը, որ այնպիսի իրավիճակ ստեղծեց, որի արդյունքում քաղաքացին հիասթափվեց և տեսավ, որ շատ հաճախ ընդդիմությունը իշխանությանը թողած մեկ այլ ընդդիմադիր ուժի դեմ է պայքարում: Եվ իր ընտրությամբ պատժեց նաև ընդդիմությանը»։
Մարտիրոսյանը կարծում է, որ «Բարև Երևան» դաշինքը պետք է ներկայացնի ոչ միայն իրեն ձայն տված քաղաքացիների շահերը, այլև ողջ ընդդիմադիր դաշտը, նրանց օգտին քվեարկողներին և նույնիսկ այն քաղաքացիներին, ովքեր ընտրակաշառք վերցնելով են գնացել ընտրության:
«Մենք ընդամենը մեր վրա դրված պատասխանատվությունն ենք փորձում իրացնել»,-ասում է Մարտիրոսյանը` տեղեկացնելով, որ մանդատները վերցնելու կամ վայր դնելու հարց «Բարև Երևան» դաշինքը չի քննարկել:
Ինքը` Արմեն Մարտիրոսյան քաղաքական գործիչը, կարծում է, որ մանդատները պետք է վերցնել, որովհետև ինչպես խորհրդարանում «Ժառանգությունը» կարողացավ շատ խնդիրներ լուծել, այնպես էլ հիմա ավագանու կազմում պետք է փորձի աշխատել:
Թեև դաշինքն ակնկալում էր մեծամասնություն լինել, բայց փոքր կազմով էլ հնարավոր է օգտակար լինել, համոզված է Մարտիրոսյանը։
