ԿարևորՀասարակություն

ԱԳ նախարարն ընդունեց Բրազիլիայի փոխարտգործնախարարին

Այսօր ԱԳ նախարար Էդվարդ Նալբանդյանն ընդունել է Երևանում աշխատանքային այցելությամբ գտնվող Բրազիլիայի փոխարտգործնախարար Վերա Մաշադոյին։ Ողջունելով հյուրին` նախարար Նալբանդյանը գոհունակությամբ նշել է, որ Հայաստանը կարևորում է հայ-բրազիլական հարաբերությունների զարգացումը և վստահություն հայտնեց, որ երկուստեք ջանքերով հնարավոր է առավել արդյունավետ օգտագործել երկկողմ հարաբերությունների ընդլայնման ներուժը։ Նախարարի խոսքերով այդ նպատակով անհրաժեշտ է ջանքեր գործադրել ամրապնդելու իրավապայմանագրային դաշտը, խորացնելու առևտրատնտեսական համագործակցությունը, սերտացնելու միջազգային կազմակերպություններում փոխգործակցությունը:

Շնորհակալություն  հայտնելով ընդունելության համար` Վերա Մաշադոն նշել է, որ Բրազիլիան շահագրգռված է բարեկամ Հայաստանի հետ տարբեր բնագավառներում հարաբերությունների ընդլայնմամբ և իր այցելությունը հենց այդ նպատակին է ծառայում։ Զրուցակիցները մտքեր են փոխանակել երկկողմ հարաբերությունների օրակարգային հարցերի, տարածաշրջանային և միջազգային մի շարք խնդիրների շուրջ:

Ցուցադրել ավելի
Back to top button