Հասարակություն

Կինն է կյանքի սկիզբն ու ապավենը. Ոստիկանապետ

ՀՀ ոստիկանության պետ, գեներալ-լեյտենանտ Վլադիմիր Գասպարյանը շնորհավորել է կանանց մարտի 8-ի առիթով:

«Սիրելի՛ կանայք:
ՀՀ ոստիկանության կոլեգիայի և իմ անունից շնորհավորում եմ Մարտի 8-ի՝ գարնան առաջին տոնի առթիվ, որ իրավացիորեն ձեր տոնն է: Կինն է կյանքի սկիզբն ու ապավենը, կինն է ընտանիքի պահապան հրեշտակն ու հիմնասյունը, կինն է երեխաների՝ մեր ապագայի ուղեցույց կատարյալը:Սիրելի՛ կանայք, սիրելի՛ գործընկերուհիներ, ի հավելումն՝ դուք նաև մեր զինակիցներն եք և մեզ հետ հավասար կրում եք ոստիկանի բարդ ու արժանապատիվ աշխատանքի բոլոր դժվարությունները՝ առանց տրտնջալու, առանց երկմտելու, աննահանջ՝ ձեր մեկ և ընդմիշտ ընտրած ճանապարհից:

Շնորհավորում եմ տոնի առթիվ, մաղթում եմ խաղաղ և արդյունավետ ընթացք ձեր աշխատանքին, որ անձնվեր ծառայություն է մեր քաղաքացիներին ու պետությանը և ըստ արժանվույն է գնահատվում թե՛ համակարգում, թե՛ հասարակության մեջ: Շնորհավորում եմ ոստիկանության ծառայողների կանանց, մայրերին, քույրերին, դստրիկներին: Դուք նույնպես զինակիցներ եք: Դուք մե՛ր տեսակից եք: Միայն ամուր, անդավաճան, սիրող թիկունք ունեցող ոստիկանը կարող է անմնացորդ կատարել իր վտանգաշատ, բայց և պատվավոր գործը, ոստիկանի՛ գործը, որին կոչվածները սակավ ու ընտրյալ են: Թող անամպ լինի բոլորիդ երկինքը, ապահով՝ տունը, երախտագետ՝ բոլոր նրանք, ում տվել ու տալիս եք ձեր սերը, գարունները, անցյալն ու ապագան և ողջ կյանքը բոլորանվեր: Աստված ձեզ պահապան»,- նշված է ոստիկանապետի շնորհավորական ուղերձում:

Ցուցադրել ավելի
Back to top button