Սաթիկ Իսահակյան
«Ռադիոլուր» — Արմավիր
Այսօր քաղաքացիական պաշտպանության համաշխարհային օրն է: Քաղաքացիական բնակչության պաշտպանության խնդիրը սրվում է հատկապես պատերազմների ժամանակ: 1931թ Ֆրանսիացի վիրաբույժ, գեներալ Սանտ Պոլը Փարիզում հիմնեց «Ժնևյան գոտիներ» ասոցիացիան, որի նպատակն էր առանձնացնել չեզոք գոտիներ կամ բաց տարածքներ, որտեղ կարող են պատերազմների ժամանակ ապաստանել քաղաքացիական բնակչությունը:
1958 թվականին այդ ասոցիացիան վերածվեց քաղաքացիական պաշտպանության միջազգային կազմակերպության, որին 1994 թ-ից անդամակցում է Հայաստանը: Այսօր քաղպաշտպանության միջազգային օրը Արմավիրի մարզի փրկարարական վարչությունը հերթական ուսումնավարժությունը անցկացվեց Արմավիրի տարածաշրջանային պետական քոլեջում, որտեղ առկա ուսուցմամբ սովորում է 370 ուսանող:
Քոլեջում միջոցառումն իրականացվեց նախապես կազմված քաղաքացիական պաշտպանության պլանի համաձայն: Քաղաքում հայտարարվել է արտակարգ դրություն, հնչում է ահազանգը և սկսվում է ուսանողների տարհանումը:
Քոլեջի երկհարկանի 2 մասնաշենքերն ունի 2 ելք` ճակատային մասից ու ետնաբակից: Այն կազմակերպվեց առանց խուճապի, միաժամանակ ուսանողները դուրս եկան 2 ելքից, շարվեցին բաց տարածքում և սպասեցին հրահանգի, ըստ որի կազմակերպվելու էր նրանց տեղափոխումը:
Քոլեջի քաղպաշտպանության շտաբի պետ Աշոտ Գիրգորյանը նշեց, որ նախապես պատրաստվել են տարահանմանը, կազմակերպված դասախոսության ընթացքում քոլեջի աշխատակազմին և ուսանողներին իրազեկել են, թե ինչ է նշանակում տարահանում, և անմիջապես մասնակցել դրան:
Երկարատև դադարից հետո քոլեջի մասնակցությունը քաղպաշտպանության միջոցառմանը, Աշոտ Գրիգորյանի խոսքերով, բարձրացնում է սահմանամերձ գոտում ապրողների զգոնության աստիճանը:
Տարհանման ուսումնավարժանքը ներգրավված է տարվա կտրվածքով կազմակերպվող միջոցառումների ցանկում,որտեղ ամեն տարի ընդգրկվում են տարբեր համայնքներ ու կազմակերպություններ, որոնց թիվը չի գերազանցում 30-ը:
Արմավիրի մարզի փրկարարական վարչության պետի տեղակալ, փրկարար ծառայության մայոր Ջոնի Բարսեղյանը տեղեկացրեց, որ անցկացնում են շտաբային, հատուկ տակտիկական, համայնքային ուսումնավարժություններ նաև կազմակերպությունների հետ:
Տարհանմանը մասնակցեց 267 ուսանող, որից 134-՝ը գյուղաբնակներ էին, իսկ 29-ը՝ սահմանամերձ համայնքների բնակիչներ: Տարհանման աշխատանքը գնահատվեց լավ, թեև որոշակի թերացումներ կային:
