ԿարևորՔաղաքական

Րաֆֆի Հովհաննիսյանի շտաբը ԿԸՀ-ից պահանջում է անվավեր ճանաչել մի քանի տասնյակ տեղամասերի արդյունքները

Հայաստանի ընտրական օրենսգրքի 48 հոդվածով սահմանված կարգով ՀՀ նախագահի թեկնածու Րաֆֆի Հովհաննիսյանը 19 փետրվարի, 2013թ. դիմել է մի շարք ընտրատարածքային ընտրական հանձնաժողովներ` մի քանի տասնյակ ընտրատեղամասերում ընտրության արդյունքները անվավեր ճանաչելու պահանջով: Այս մասին հաղորդագրություն է տարածել Րաֆֆի Հովհաննիսյանի նախընտրական շտաբը: Հաղորդագրությունում ասվում է.

«Պահանջի բավարարումը ենթադրում է քվեարկության արդյունքների վերահաշվարկ, որի ընթացքում «դիմող կողմն այլ փաստաթղթերի հետ իրավունք ունի ծանոթանալու ընտրողների ստորագրած ցուցակներին, ինքնուրույն կատարելու քաղվածքներ» (ԸՕ հոդված 48, կետ 14): Գործընթացին իրավասու են ներկա գտնվել եւ հետեւել թեկնածուի վստահված անձինք, լրագրողներ, դիտորդներ:

Ընտրատարածքային հանձնաժողովներ ներկայացված դիմումներում հստակ նշված է եղել Րաֆֆի Հովհաննիսյանի նախընտրական շտաբի հեռախոսահամարը, որով թեկնածուին պետք է տեղյակ պահվեր դիմումին տրված ընթացքի եւ յուրաքանչյուր ընտրատեղամասի` քվեարկության արդյունքների վերահաշվարկի ժամի մասին, որպեսզի հնարավոր լիներ ապահովել Հովհաննիսյանի վստահված անձանց ներկայությունը:

Մինչդեռ առանց որեւէ հեռախոսազանգով կամ կապի այլ միջոցով թեկնածուին տեղյակ պահելու, առանց թեկնածուի վստահված անձանց ներկայության մի շարք ԸԸՀ-ներում այսօր ժամը 11:00-ից մեկնարկել է վերահաշվարկների գործընթաց:

Խստիվ դատապարտելով օրինականության այս աղաղակող խախտումը, պաշտոնապես պահանջում ենք անմիջապես, բոլոր ԸԸՀ-ներում դադարեցնել ՀՀ նախագահի թեկնածու Րաֆֆի Հովհաննիսյանի դիմումների հիման վրա կատարվող քվեարկության արդյունքների վերահաշվարկները:

Դրանք սկսել միայն եւ պարտադրաբար թեկնածուի շտաբին տեղյակ պահելուց եւ Հովհաննիսյանի վստահված անձանց, լրագրողների, դիտորդների` ԸԸՀ-ներ ժամանելուց հետո»:

Ցուցադրել ավելի
Back to top button