Հասմիկ Դիլանյան
«Ռադիոլուր»
Կենտրոն վարչական շրջանում գտնվող Հրաչյա Աճառյանի անվան դպրոցում տեղակայված 10/08 ընտրատեսամասում է իր քաղաքցիական պարտքը կատարել ԱԺ նախագահ Հովիկ Աբրահամյանը: Նա քվեարկության էր եկել թոռան՝ Հովիկի ուղեկցությամբ ու բարձր տրամադրությամբ: «Ես քվեարկել եմ կայուն Հայաստանի զարգացման, մեր հայրենիքի անվտանգության ու ապահով Հայաստանի համար»,- լրագրողների հետ զրույցում հայտարարել է ԱԺ նախագահը: Խորհրդարանի խոսնակը, ի դեպ, ընտրություններին հետևելու է իրենց կենտրոնական շտաբից:
«Ես համոզված եմ, որ այս ընտրությունները լինելու են ավելի լավը, քան մեր խորհրդարանական ընտրությունները, և իշխանություններն ամեն ինչ արել են, որպեսզի այս ընտրություններն անցնեն օրենքի սահմաններում: Իմ կարծիքով արդեն առավոտյանից սկսած որևէ լուրջ խախտում, թերություն, ահազանգ չունենք, դա շատ լավ է, դա մեր ժողովրդի ձեռքբերումներից է, հասարակության ձեռքբերումն է, և ես համոզված եմ, որ անպայման մեկ քայլ առաջ կլինի, քան խորհրդարանական ընտրություններն էին: Ես չեմ բացառում կոալիցիոն ձևավորման որևէ ձևաչափ, ամեն ինչ հնարավոր է, ուղղակի սպասենք ընտրություններն ավարտվեն, անպայման մենք կքննարկենք, առայժմ մենք զբաղված ենք ընտրություններով»:
