Լուսինե Վասիլյան
«Ռադիոլուր»
Կենտրոնական ընտրական հանձնաժողովում այսօր լրագրողների և դիտորդների ներկայությամբ փորձարկել են այն թանաքանյութը, որով ընտրությունների օրը կատարվելու է անձնագրերի դրոշմակնքումը: Խորհրդարանական ընտրությունների ժամանակ օգտագործված թանաքանյութը, հիշեցնենք, որոշ տեղամասերում վիճահարույց դարձավ՝ անձնագրերից անհետանալով ավելի շուտ, քան նախատեսված 12 ժամը:
Հանձնաժողովի անդամները լրագրողների ներկայությամբ, հատուկ թանաքի օգտագործման ուղեցույցի կանոներով դրոշմակնքեցին մի քանի անվավեր անձնագրեր: Ուղեցույցը, ի դեպ, կազմվել է ԿԸՀ կողմից և տրամադրվել ընտրական բոլոր հանձնաժողովներին: Դրանում մանրամասն՝ կետ առ կետ, ներկայացվում են թանաքի օգտագործման քայլերը:
«Առաջին կարևորագույն խնդիրը թանաքանյութը մինչև օգտագործելը խառնելն է , երկրորդ գործոնը՝ դրոշմակնքման ճիշտ իրականացումը կամ այն կանոնների պահպանումը, որոնք նշված են ուղեցույցում»:
Բացի այդ, ըստ ԿԸՀ նախագահ Տիգրան Մուկուչյանի, այնքան են կարևորել թանաքի խնդիրը, որ հունվարի 28-ից սկսված դասընթացների մեջ այն դարձրել են ուսուցման առանձին առարկա։ Հանձնաժողովի բոլոր անդամներին կետ առ կետ բացատրել են կանոնները, տեղամասային հանձնաժողովներում փորձարկել են թանաքանյութը: Որևէ բողոք չեն գրանցել:
«Կարծում եմ, որ նախորդ ընտրություններին նկատած թերությունների հիման վրա կատարելագործված թանաքանյութը այս անգամ որևէ խնդիր չի առաջացնի»:
Թանաքանյութը, ի դեպ, ձեռք է բերվել այն նույն անգլիական ընկերությունից, որի հետ համագգործակցությունը եղել է նաև նախորդ ընտրությունների ժամանակ, որովհետև, ըստ ԿԸՀ նախագահի, չկա մեկ այլ կազմակերպություն, որին հայտնի է նման հատկանիշներով նյութ։
«Համագործակցությունը այդ կազմակերպության հետ շարունակվեց: Նրանք նույնպես տեղեկացված էին, թե ինչ խնդիրներ ենք ունեցել, նոր փորձանմուշներ սկսեցին ուղարկել՝ մոտ 13-ը , դրանցից ընտրել ենք լավագույնը»։
Հաշվի են առնվել անգամ Հայաստանի ջերմային պայմանները: Այսքանից հետո եթե թանանքանյութերի հետ կապված խնդիրներ առաջանան, նաև սուբյեկտիվ գործոններով պայմանավորված ,ապա, ըստ ԿԸՀ նախագահի, կնշանակի, որ գործ ունենք իրավախախտման հետ։
