Նվարդ Դավթյան
«Ռադիոլուր»
2012-ի դեկտեմբերի համեմատ այս տարվա հունվարին ամենաբարձր գնաճը նկատվել է պարենային ապրանքների շուկայում. դրանք թանկացել են 5.1 տոկոսով: Այս ցուցանիշի վրա մեծապես ազդել են պտուղ-բանջարեղենի, կարտոֆիլի բարձր գները` ամփոփելով հունվարի գնաճային ցուցանիշերն այսօր ասաց Ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը:
Օրինակ` մրգի գնաճը կազմել է ավելի քան 11 տոկոս: Նրա խոսքով` եթե նշված ապրանքատեսակների դեպքում գնային փոփոխություններ չարձանագրվեին, ապա այս հունվարին 2012-ի դեկտեմբերի համեմատությամբ 2.9 տոկոսի փոխարեն սպառողական շուկայում գնաճը կլիներ կես տոկոսի սահմանում։
Բանջարեղենից, մրգից բացի հունվարին կաթնամթերքը թանկացել է 2.3, ձուն` 4.6, ձկնամթերքը` 1.8 տոկոսով: 1 տոկոսով ավելի թանկ վաճառվել է նաև միսը: Բարձրացել են նաև ոգելից խմիչքի ու ծխախոտի, սուրճի, թեյի, կակաոյի, հացամթերքի գները, նվազել ոչ ոգելիչների, շաքարավազի ու հրուշակեղենի գները:
Վերադառնանք հունվարի գնաճային ցուցանիշերին: Գուրգեն Մարտիրոսյանի խոսքով` 0.8 տոկոսով ավելացել են ծառայությունների սակագները։ Գների նվազում է նկատվել ոչ պարենային ապրանքների գծով` 0.2 տոկոս: Դա պայմանավորված է կոշկեղենի, հագուստի, գործվածքի, այգեգործական ու մի շարք այլ ապրանքների գների նվազմամբ: Ծառայությունների դեպքում գնաճ է նկատվել տրանսպորտի, բուժսպասրակման, հանգստի կազմակերպման ոլորտներում: Նախատոնական ու տոնական օրերին, ինչպես հայտնի է, առողջարանների, հանգստյան տների ուղեգրերի արժեքը բարձրանում է:
Ներկայացված պատկերը վիճվարչության աշախատկիցը հունվար ամսվա համար օրինաչափ է համարում, քանի որ նախորդ տարիների դինամիկան նույնպես ցույց է տալիս` հունվարին մշտապես ունցել ենք առավել բարձր գնաճային միտումներ: