Տնտեսական

Արտոնագրային վճարից բողոքում են ոչ միայն ատամնաբույժները

Լիանա Եղիազարյան

«Ռադիոլուր»

Այսօր հերթական դժգոհություններն են հնչել կապված այս տարեսկզբից ուժի մեջ մտած արտոնագրային վճարի մասին։ Օրեր առաջ ստոմատոլոգներն էին իրենց ձայնը բարձրացրել` ընդգծելով, թե մասնագիտական շատ նրբություններ հաշվի չեն առնվել օրենքը փոփոխելիս:
Այսօր էլ իրենց մասով են բողոքել Բորսայի տնօրեն Արտյոմ Պրիբլինսկին, անշարժ գույքի գործակալության տնօրեններ Մարինե Չատինյան եւ Լեռնիկ Եսայանը:
Արտյոմ Պրիբլինսկին դժգոհություններ ունի նաեւ նոր ներդրված շրջանառության հարկի հետ կապված: Նա պնդում է, որ հարկերի ծանրացումն իրենց միայն մեկ ուղի է թողնում` դեպի ստվեր, ստիպում ցույց չտալ աշխատողների իրական թիվը:
Ասվածին իր համոզմունքն է ավելացնում մեկ այլ անշարժ գույքի գործակալության տնօրեն՝ Լեռնիկ Եսայանը` հարցադրում անելով` ինչու պետք է այդ գործակալությունները 60 հազար դրամ վճարեն ամեն աշխատողի համար` անկախ այն բանից, աշխատողը բրոքեր է, չափագրող, գործավար, թե հավաքարար։
Ռիելթորները եւ անշարժ գույքի ոլորտում գործող տնտեսվարողները վաղը ծրագրում են խոշոր հանդիպում ունենալ եւ քննարկել իրենց հետագա անելիքները: Իսկ փոփոխությունների հեղինակները դեռ պարզաբանում չեն ներկայացնում: ՊԵԿ-ից խոստացան այս հարցին պատասխանել ավելի ուշ:

Ցուցադրել ավելի

Թողնել պատասխան

Back to top button