Մշակույթ

Գիրքը պետք է պահանջված լինի ընթերցողի կողմից. ԱՊՀ խորհրդի նիստը Երեւանում

 Սոնա Հակոբյան

«Ռադիոլուր»

Երևանում այսօր մեկնարկել է պարբերական մամուլի, գրահրատարակչության, գրքերի տարածման և պոլիգրաֆիայի ոլորտում համագործակցության հարցերով ԱՊՀ  մասնակից  պետությունների միջպետական խորհրդի 17-րդ նիստը: Խորհդրի նիստի նախագահ է ընտրվել մշակույթի նախարարության գրահրատարակչական գործի գործակալության պետ Էդվարդ Միլիտոնյանը։
Պատահական չէ, որ այս նիստն անցկացվում է Գրքի համաշխարհային մայրաքաղաք Երևանում և գրատպության 500-ամյակի շրջանակներում: Կարևորելով նիստի անցկացումը հենց Հայաստանում` խորհրդի համանախագահ  Էդվարդ Միլիտոնյանը նկատեց, որ գրահրատարակչության տեսակետից Հայաստանն ԱՊՀ տարածքում բավականին առաջատար դիրք է գրավում և կարող է օրինակ ծառայել բազմաթիվ այլ երկրների համար:
Բայց քանի որ գիրք հրատարակելը ինքնանպատակ գործ չէ, գրահրատարակչության խնդիրներից Միլիտոնյանն առանձնացրեց ընթերցանության խթանումը: Նա գտնում է, որ բացի որակից և առանձնահատկություններից գիրքը պետք է նախևառաջ պահանջված լինի ընթերցողի կողմից:
Նիստի երկօրյա աշխատանքներին մասնակցում են Հայաստանի, Բելառուսի, Ղազախստանի, Մոլդովայի և Ռուսաստանի պատվիրակությունները, ինչպես նաև ԱՊՀ  մասնակից  պետությունների Գրատարածողների ասոցիացիայի ու Գիտությունների ակադեմիաների միջազգային ասոցիացիային կից գրահրատարակչության խորհրդի  ներկայացուցիչները: Ներկայացուցիչներ չկան միայն Տաջիկստանից և Ադրբեջանից:
Ի դեպ` խորհրդակցությունից բացի նիստի մասնակիցները հնարավորություն կունենան ծանոթանալու նաև Հայաստանին և հայկական մշակույթին:

Ցուցադրել ավելի

Թողնել պատասխան

Կարդացեք նաև
Close
Back to top button