Մեքսիկայի մայրաքաղաքում Հեյդար Ալիևի՝ վերջերս տեղադրված արձանի շուրջ մեծ աղմուկ էր բարձրացել, թեև խնդիրը միանգամից լուծվողներից չէ, քանի որ ադրբեջանցիները մինչև արձանի տեղադրումը տեղական իշխանության հետ կնքել են պայմանագիր, համաձայն որի՝ արձանն իր տեղադրավայրում պետք է մնա 99 տարի: Սակայն, Մեխիկոյի քաղաքապետարանի ներկայացուցիչ Ֆիլիպե Լիլը հայտարարել է, որ, այնուամենայնիվ, ստեղծված հանձնաժողովը պետք է որոշի, թե ինչպես վարվի այդ հուշարձանի հետ: «Associated Press»-ի հաղորդմամբ, տեղացի հասարակական բազմաթիվ գործիչներ հանդես են գալիս ադրբեջանցի «բռնակալի» հուշարձանը Մեխիկոյի տարածքից հանելու պահանջով: Դժգոհություններ են արձանագրվում նաև շարքային քաղաքացիների շրջանում:
