Մաքուր բարեկարգ փողոցներով համայնք. Սառնակունքի համայնքապետի ցանկությունը
Հասմիկ Դիլանյան
«Ռադիոլուր»
Սյունիքի մարզի Սիսիանի տարածաշրջանի Սառնակունք համայնքը գտնվում է բարձր լեռնային գոտում, ծովի մակրերույթից 2170 մետր բարձրության վրա, ունի 540 բնակիչ: Համայնքի վարչական տարածքը 12 հազար հա է , որի մեծ մասը գյուղատնտեսական նշանակության հողեր են:
Սառնակունքում դպրոց ու մանկապարտեզ էլ կա. Սառնակունքի միջնակարգ դպրոցի պատմության ուսուցիչ Սարգիս Կարապետյանն ասում է, որ մանկավարժի աշխատավարոձով հնարավոր չէ ընտանիք պահել: Հենց սրանով է նա բացատրում, որ հատկապես քաղաքների դպրոցներում տղամարդ ուսուցիչ էիչ է մնացել:
Գյուղում ուրիշ է, դասերից հետո պարտադիր կամ հող են մշակում, կամ էլ անասնապահությամբ զբաղվում։
«80 հազար աշխատավարձ եմ ստանում: Ունեմ երեք երեխա։ Տարեկան մենակ հարյուր հիսուն հազար դրամ շորերին ու գրենական պիտույքներին ենք տալիս; Իհարկե աշխատավարձս քիչ է»,- ասում է ուսուցիչը:
12 հազարի հա հողից Սառնակունքում շատ քիչ մասն է մշակվում: Հիմնականում հաճար են ցանում, երբեմն նաև աշնանացան ու գարնանացան ցորեն և գարի:
«Սոցիալական խնդիրներ իհարկե ունենք,- ասում համայնքի ղեկավար Մանուչար Մկրտչյանը,- շուկայից հեռու ենք, գյուղմթերքի ինքնարժեքն ավելի բարձր է: Կողքի մարզերից բերում են, մարդիկ փոխանակում են կատարում, կանխիկ գումարի խնդիր ունենք»:
Սերյոժա Ավանեսյանը ծնվել ու մեծացել է Սառնակունքում: Ունի չորս հեկտար հող, սակայն չի մշակում: Ասում է` «վառելիքն է թանկ» ու հիշում խորհրդային տարիները, երբ ամեն ինչ մատչելի էր, գյուղում աշխատատեղեր էլ կային։
«Երիտասարդները մեկ երկու ամիս խոտհունձով են զբաղվում, հետո պարապ-սարապ թափառում են»,- պատմում է զրուցակիցս ու հավելում` երիտասարդն ամուսնանա ինչ անի:
Ի նչ է ուզում, որ Սառնակունքում փոխվի համայնքի ղեկավարը. «Կուզենայի մաքուր բարեկարգ փողոցներով համայնք ունենալ, ինչին խանգարում են միջոցները։ Համայնքն ունի 7 մլն դրամ»։
Գուցե կառավարության որդեգրած տարածքների համաչափ զարգացման ծրագիրը սառնակունքցիների կյանքում ինչ- որ բան փոխի: Այստեղ դեռ սպասում են: