ՀՀ վարչապետ.Հարկային ոլորտում տիրող իրավիճակի համար այսուհետ պատասխանատվություն են կրելու նաև նախարարները
Հասմիկ Դիլանյան
«Ռադիոլուր»
Վարչապետ Տիգրան Սարգսյանը, կատարելով նախագահ Սերժ Սարգսյանի հանձնարարականները, որոնք նա տվել էր անցած շաբաթ հարկաբյուջետային քաղաքականության հարցերով խորհրդակցության ժամանակ, այսօր` կառավարության նիստի սկզբում հայտարարել է, որ այսուհետ պետք է բացառվի հարկային մարմինների գործունեության նկատմամբ ցանկացած միջնորդություն ու միջամտություն: Վարչապետը ցավով արձանագրել է, որ այդպիսի երևույթներ հանրապետությունում դեռևս առկա են:
«Ես իմ անձնական հսկողության տակ եմ պահելու խնդիրը»,- կառավարության անդամներին ասել է Տիգրան Սարգսյանը` ընդգծելով. «Բոլորը պետք է քաջ գիտակցեն, որ հարկերի հավաքագրումը պատասխանատու գործառույթ է և դա միայն պետական եկամուտների կոմիտեի պատասխանատվության խնդիրը չէ, այլ ողջ կառավարության»:
Անդրադառնալով հանրապետության նախագահի մյուս հանձնարարականին` վարչապետը կառավարության անդամներին տեղեկացրել է, որ այսուհետ նախարարները նույնպես պատասխանատվություն են կրելու հարկային ոլորտում տիրող իրավիճակի համար: «Դուք պետք է պարբերաբար հանդես գաք հաշվետվություններով և ներկայացնեք, թե կոնկրետ ինչպիսին է տնտեսական աճի ցուցանիշը և թե ինչպես են այդ ոլորտների ձեռնարկությունները կատարում իրենց հարկային պարտավորությունները»,-ասել է վարչապետը:
Նշենք, որ կառավարության հաջորդ նիստի ժամանակ հաշվետվություններ են ներկայացնելու կրթության և գիտության, տրանսպորտի ու կապի, էներգետիկայի և բնական պաշարների նախարարները:
Անդրադառնալով արդեն այսօրվա նիստի օրակարգային հարցերին` կառավարությունը հաստատել է «Օտարերկրացիների մասին» օրենքում փոփոխությունների մասին նախագիծը: Համաձայն այդ փոփոխությունների` 2013 թվականի հունվարի 10-ից Եվրոպական միության անդամ պետությունների և Եվրոպական միության շենգենյան դրույթները կիրառող, բայց միության անդամ չհանդիսացող պետությունների` Իսլանդիայի, Լիխտենշտեյնի, Նորվեգիայի և Շվեյցարիայի քաղաքացիների համար սահմանվում է առանց մուտքի վիզայի այցելությունների ռեժիմ:
