Վերլուծական

Վերլուծաբան.Վրաստանի այս նոր քաղաական իրողությունը Ադրբեջանն ու Հայաստանն այսուհետ չեն կարող անտեսել

Կարեն Ղազարյան
«Ռադիոլուր»

Վրաստանի խորհրդարանական ընտրություններն էական քաղաքական իրադարձություն էին, որոնք այդ երկրի համար ստեղծում են այնպիսի միջազգային դրություն, որ թույլ է տալիս Վրաստանը համարել տարածաշրջանում ժողովրդավարական եւ իրավական պետություն: Թեմային անդրադառնալով` վերլուծաբաններ Շուշան Խաթլամաջյանն ու Անդրեա Ղուկասյանը, լրագրողների հետ այսօրվա հանդիպման ժամանակ, կարծիք են հայտնել, որ Վրաստանի այս նոր քաղաական իրողությունը Ադրբեջանն ու Հայաստանն այսուհետ չեն կարող անտեսել:

Հետխորհրդային մի բարդ երկիր կարողացավ հաղթահարել արատավոր երեւույթներն ու ձեւավորել նոր, ժամանակակից քաղաքական համակարգ: Վերլուծաբան Անդրեաս Ղուկասյանի գնահատականն է` Վրաստանի խորհրդարանական ընտրություններում ընդդիմության հաղթանակի կապակցությամբ: Ըստ վերլուծաբանի` գործող նախագահ Սահակաշվիլին փորձելու է իր ուժի համար ստեղծել որպես ընդդիմություն աշխատելու համար անհրաժեշտ պայմաններ: Անդրեաս Ղուկասյանի բնորոշմամբ` դա նրա համար բնական օրակարգ է եւ նա կկարողանա շատ արագ դուրս գալ այդ գործընթացից: Վերլուծաբանը չբացառացեց նաեւ, որ Սահակաշվիլին ժամկետից շուտ հրաժարական ներկայացնի եւ Վրաստանի անցումային այս շրջանն ավելի շուտ ավարտվի:

Վերլուծաբան Շուշան Խաթլամաջյանի կարծիքով` Վրաստանում խորհրդարանական կառավարմանն անցումը մեծ բան կտա հասարակ վրացուն: Նրա խոսքով` այն պրոյեկտը, որն իրականացվում է Վրաստանում կշարունակվի նույն ուղղությամբ եւ արտաքին կողմնորոշումների հարցում որեւէ տեղաշարժ չի լինի:

Վերլուծաբան Անդրեաս Ղուկասյանի դիտարկմամբ նույնպես ռուս-վրացական լարվածությունը նոր քաղաքական պայմաններում չի վերանա: Ըստ նրա, սակայն, կարող է փոխվել հակասությունների ձեւաչափը: Եթե մինչ օրս երկու պետությունների ղեկավարների միջեւ հակադրությունը անձնական հարթություն էլ էին տեղափոխվում, ապա այսուհետ դրանք ավելի քաղաքակիրթ մթնոլորտում կմնան: Չնայած դրա, ըստ Անդրեաս Ղուկասյանի, արմատական հարցերը վրաստանյան իշխանափոխությամբ չեն կարող լուծվել: Վրաստանը, բնականաբար, Հայաստանի համար կարեւոր հարեւան է, ուստի դա որոշակի դրական բան կարող է տալ, սակայն, վերլուծաբանի խոսքով, Վրաստանի ժողովրդավարական պրոեկտը դժվար թե որեւէ ձեւով տարածվի ջավախքահայության վրա: Այս առումով էլ կասկածելի է` արդյոք վրացական ժողովրդավարությունը իրական բնույթ է կրում` եզրահանգեց Շուշան Խաթլամաջյանը: Անդրեաս Ղուկասյանի դիտարկմամբ, սակայն, Վրաստանում ցանկացած դրական փոփոխություն դրական է եւ ջավախքահայության եւ Հայաստանի համար:

Ցուցադրել ավելի

Թողնել պատասխան

Back to top button